لا تفرح إن الوقت أسعدك واعطاك !!

السلام عليكم ورحمة الله وبركاته :
لا تفرح إن الوقت أسعدك واعطاك
لابد ما سود الليالي تبكيك

دنيا تقلب علها ماتولاك
تمسي عزيز وتصبح من الصعاليك

إلى اقبلت تخفي عيوبك عن اعداك
وإلى ادبرت تظهرعيوبك لاهاليك

اغنم من صروف الدهر كانه امداك
قبل اللحد عن ظاهر الارض يخفيك

وترى التشكي للمخاليق يشناك
يحط من قدرك ويفرح امعاديك

وكثر التشره يجعل الناس تجفاك
ولا عاد تلقى بينهم من يخاويك

ولا تمادى في زعل من ترضاك
مادام جاء عاني على شأن يرضيك

ولا تخاوي من على ابوه بداك
هذاك وان طال الزمان يغدر فيك

والجاهل احذر لاتجادله يبلاك
في كلمة بين المخاليق تعميك

والهرجه العوجى لو أنه تنصاك
حاول تجاهلها وخله تعديك

ولاتخيب هقوت اللي تهقواك
مادام جاء بين المخاليق ناصيك

واحذر تهزا يافتى بخلق مولاك
تشوفها باقرب قريبٍ يواليك

ولاتفرح بزودٍ على الحق وان جاك
زودك ترى نقصٍ على حق ذوليك

وخل القناعه ميزةٍ من مزاياك
مع القناعه كل شيٍ يكفيك

وان جت لك الدنيا على غير مشهاك
اصبر ترى بالصبر تدرك امانيك

لا تأمن الدنيا ترى الوقت فتاك
لاجا القدر كثر الحذر ما ينجيك